Den 25. juni samlast det europeiske fagmiljøet for digitale lommebøker i Berlin. Digdir er invitert til å dele erfaringar frå det norske arbeidet med å førebu offentleg og privat sektor på den digitale lommeboka.
Konferansen EUDI ON 2026 – The EUDI Wallet Summit for Digital Innovators blir arrangert 25. juni 2026 i Berlin. Arrangementet samlar sentrale aktørar frå det europeiske lommebok-økosystemet, både fysisk og digitalt, for å utveksle erfaringar frå brukscase og framdrift i utviklinga av den europeiske digitale lommeboka.
Det tyske og det norske fagmiljøet kjenner kvarandre frå før. På Digdirs eIDAS-konferanse i Sogndal i mars deltok to ekspertar frå det tyske SPRIND med foredraget «Germany's Path to a Unified European Identity System». Slik sett held Berlin-konferansen fram denne dialogen på europeisk nivå.
Konferansen blir arrangert av det nasjonale tyske lommebok-prosjektet, som blir leia av SPRIND på vegner av det tyske forbundsdepartementet for digitalisering og statsmodernisering (BMDS). Programmet går føre seg på engelsk, og det blir mogleg å følgje utvalde programpostar digitalt.
Digdir på podiet
Det tyske prosjektet tek i bruk fleire av dei same verkemidla som Noreg. Begge landa har etablert ei sandkasse for testing av lommebokløysingar, og nyttar hackathon og open konferanse som møteplassar for involvering og utprøving.
Frå Digdir deltek sjefsarkitekt Jørgen Binningsbø, som skal halde ein presentasjon om korleis Noreg arbeider med å gjere offentleg og privat sektor klar for digitale lommebøker. Den nasjonale sandkassa for digital lommebok står sentralt i presentasjonen.
I forkant av konferansen blir det arrangert ein heildigital hackathon 4.–5. juni, der utviklarar og andre interesserte kan teste løysingar knytte til det tyske lommebok-økosystemet. Dei vinnande laga blir inviterte til å presentere resultata sine på konferansen i Berlin.