Ei fersk undersøking viser at folk i EU først og fremst vil bruke den nye digitale lommeboka til heilt vanlege kvardagsoppgåver – som å hente e-resept på apoteket, vise helsetrygdkort på reise, signere digitalt og betale trygt både på nett og i butikk.
Totalt har 2800 innbyggjarar frå alle EU-landa svart på undersøkinga, der dei tok stilling til 41 ulike måtar å bruke den europeiske digitale identitetslommeboka på.
Helse viktig for alle
Uansett livssituasjon er helsetenester det viktigaste folk vil bruke lommeboka til. Saman med betaling og ulike digitale bevis er dette det som klart oftast får folk til å seie at dei ville laste ned og ta i bruk ei slik løysing.
Øvst tronar tre typar helsetenester: Å kunne lese eigne journalar, bruke elektroniske reseptar og vise digitalt bevis på helsetrygd eller reiseforsikring.
Signering, betaling og deling kjem like bak
Elektronisk signering og betaling hamnar også blant dei fem mest populære bruksområda på tvers av alle grupper.
Studentar og folk som arbeider eller bur i eit anna land enn heimlandet, er spesielt opptekne av å kunne sende inn og dele dokument digitalt på ein enkel måte, for eksempel ved opptak til studiar.
Folk som reiser mykje, inkludert jobbreisande, peikar særleg på behovet for trygg betaling i ulike land og situasjonar.
Ulike prioriteringar i ulike livsfasar
Pensjonistar løftar fram e-resept og digitale bevis på nedsett funksjonsevne som ekstra viktige, noko som heng saman med at dei oftare brukar helsetenester enn andre.
For å gjennomføre undersøkinga brukte forskarane metoden MaxDiff, der deltakarane heile tida måtte velje kva som var viktigast av fleire alternativ, slik at ein ser kva dei faktisk prioriterer i kvardagen.