Norsk ekspertgruppe og andre interessentfora
Digdir har etablert ei ekspertgruppe med sentrale aktørar på nasjonalt nivå for implementeringa av eIDAS 2.0-forordninga og sikre god innføring av den digitale identitetslommeboka og at norske interesser blir ivaretatt. Parallelt har Digdir ambisjon om å etablere fleire samarbeidsfora for både offentlege og private aktørar i arbeidet fram mot realisering av lommeboka.
Forordninga eIDAS 2.0 vil ha stor betydning for elektronisk identifikasjon (eID) og korleis borgarar i Noreg og andre europeiske land samhandlar digitalt med offentleg og privat sektor. Ein sentral del av forordninga er introduksjonen av europeiske digitale identitetslommebøker.
Digdir er representert på fleire nivå i European Digital Identity Cooperation Group (EDICG) i EU som har som føremål å støtte implementeringa av eIDAS 2.0, gi råd til EU-kommisjonen og bidra i bygginga av «verktøykassen» til europeiske digitale identitetslommebøker.
Ekspertgruppa
På nasjonalt nivå har Digdir etablert ei ekspertgruppe som kan bidra med råd og utveksling av beste praksis for å sikre at krav, standardar og rettsakter for den digitale lommeboka varetar norske interesser. Ambisjonen er å skape eit fungerande samarbeidsforum som sikrar god informasjonsflyt, brei involvering og opne drøftingar om det viktige arbeidet som står føre oss.
Første møte var 15. januar 2025. På møtet vart det gitt ein introduksjon til eIDAS 2.0-forordninga, EDICG og arkitektur- og referanserammeverket, gjennomføringsrettsaktene og prosessane knytt til dette - samt bakgrunn og mål med konseptvalutgreiinga (KVU) som er i gang.
Andre samarbeidsarenaer
Parallelt vil det også bli etablert eit breiare interessentfora for både private og offentlege aktørar. Digdir vil arbeide for at prosessen knytt til implementeringa av eIDAS 2.0 og arbeidet med identitetslommeboka i Noreg skjer på ein open og involverandre måte der alle relevante aktørar og brukergrupper opplever at innsyn, inkludering og involvering blir ivaretatt.