MinID er blitt ein sikrare og meir brukarvennleg elektronisk ID

Vesentleg meir brukarvennleg

Med endringane som har vore gjort i 2023 og 2024 er MinID betydeleg oppgradert. 24. januar i år vart nye brukargrensesnitt tilgjengeleg i MinID. Desse har gjort det enklare for brukaren både å logge inn til tenester og lage nytt passord. Funksjonaliteten er tilgjengeleg både i appen og webløysinga. Nye brukargrensesnitt, i kombinasjon med at MinID kom over på ny plattform i 2023 og leverer ei hastigheit som ikkje har vore mogleg tidlegare, har forbetra brukarvennlegheita vesentleg.

Ein sikrare elektronisk ID

I fjor vart pin-kodar fasa ut og erstatta med aktiveringkode med avgrensa levetid, i tråd med lovverk og internasjonal standard. Måten data vert lagra i databasen er forbetra, og MinID brukar no ny og betre krypteringsteknologi, som skal sikre at brukaren sitt passord ikkje hamnar i feil hender. I tillegg er det lagt til rette for nye og forbetra 2-faktor-metodar som til dømes godkjenning i app og tidsavgrensa eingongspassord (TOTP) for autentiserings-appar. Desse grepa har gjort MinID til ein enda sikrare elektronisk ID.

MinID i framtida

Framover ønsker vi å gjere MinID meir tilgjengeleg for enda fleire. Brukaropplevinga skal forenklast ytterlegare, slik at løysinga vert lettare å bruke også for dei yngste brukarane.

Vi skal køyre ein ny pilot i skulen der fleire elevar kan få MinID i klasserommet. Da vil vi pilotere heile verdikjeda med autorisasjon, førehandsprovisjonering, utsending og registrering.

Vidare kjem vi til å lansere ein ny sjølvregistrert MinID-variant. Denne skal ved hjelp av 1-faktor gjere det mogleg å gjenkjenne brukarar utan norsk folkeregistrert identitet i enkelttenester på nett og på tvers av desse tenestene.

Vi har også planar om å bygge ut MinID med digital ID-kontroll så snart regelverket er klart for dette.

Lommebokteknologi er også noko vi vurderer i MinID-kontekst.